Umsögn Landssamtakanna Þroskahjálpar um frumvarp til laga um leigubifreiðaakstur

Umsögn Landssamtakanna Þroskahjálpar um frumvarp til laga um leigubifreiðaakstur nr. 120/2022 (öryggi og starfsumhverfi), 388. mál             

5. júní 2025

Landssamtökin Þroskahjálp vinna að réttinda- og hagsmunamálum fatlaðs fólks, með sérstaka áherslu á fólk með þroskahömlun og/eða skyldar fatlanir, einhverft fólk  og fötluð börn og ungmenni. Samtökin byggja stefnu sína á samningi Sameinuðu þjóðanna um réttindi fatlaðs fólks, barnasáttmála SÞ og öðrum fjölþjóðlegum mannréttindasamningum sem íslenska ríkið hefur undirgengist, sem og á heimsmarkmiðum Sameinuðu þjóðanna, sem hafa það meginmarkmið að skilja engan eftir.

Fatlað fólk er oft mjög háð leigubifreiðakstri og jafnframt mjög berskjaldað gagnvart ýmis konar ofbeldi og/eða misnotkun, þ.m.t. fjárhagslegri, eins og rannsóknir sanna. Samtökunum hafa borist margar ábendingar  þess efnis að farþegar hafi þurft að greiða verulega háar fjárhæðir fyrir ferðir  og að engar leiðir hafi verið fyrir notendur til að koma sínum kvörtunum á framfæri. Það er því mjög mikilvægt að auðrekjanlegt sé hvaða leigubifreið og eða leigubifreiðastöð viðkomandi hefur átt í viðskiptum við. Vegna þessa er mikilvægt að felld verði niður  heimild rekstrarleyfishafa til að reka leigubifreiðastöð þar sem aðeins ein leigubifreið hefur afgreiðslu, sem og þær breytingar að leigubifreiðastöðvum verði gert að taka við rafrænum upplýsingum um upphafs- og endastöð ferðar, um staðsetningu meðan á ferðinni stendur, að greiðsla sé skráð í gjaldmæli eða með öðrum fullnægjandi hætti að ferð lokinni og að aðrar nauðsynlegar ráðstafanir verði til að tryggja öryggi og réttindi neytenda.

Virðingarfyllst.

Unnur Helga Óttarsdóttir, formaður Þroskahjálpar

Anna Lára Steindal, framkvæmdastjóri Þroskahjálpar

Málið sem umsögnin fjallar um má finna hér