Um Þroskahjálp
Landssamtökin Þroskahjálp voru stofnuð árið 1976. Að þeim standa félög sem vinna að réttindum og hagsmunum fólks með þroskahömlun og skyldar fatlanir.
Við veitum ráðgjöf, vinnum að verkefnum með fötluðu fólki og þrýstum á stjórnvöld um breytingar. Starfið snýst um að fatlað fólk geti ráðið eigin lífi og tekið þátt í samfélaginu til jafns við annað fólk.
- Stofnuð
- 1976
- ár af réttindabaráttu
- 50
- aðildarfélög
- 15
- alþjóðleg samtök sem við eigum aðild að
- 4
Upplýsingar og ráðgjöf
Áttu spurningu um réttindi fatlaðs fólks, þjónustu eða stuðning? Við veitum fötluðu fólki og aðstandendum upplýsingar og ráðgjöf. Hjá okkur starfar fólk með sérþekkingu á þessum málum.
Þú getur hringt í 588 9390 eða sent okkur línu á throskahjalp@throskahjalp.is.
Við vinnum með stjórnvöldum og veitum þeim aðhald
Við tökum þátt í ráðum og samráðshópum og skrifum umsagnir um mál sem snerta fatlað fólk. Við bendum á það sem þarf að laga og fylgjum eftir kröfum um breytingar.
Réttindi þurfa að skila sér í daglegu lífi. Það á ekki að þurfa endalaus símtöl, umsóknir og fundi til að fá þjónustu sem fólk á rétt á. Við þrýstum á þau sem bera ábyrgð á þjónustunni að standa við skyldur sínar.
Við vinnum líka með fyrirtækjum og stofnunum, meðal annars að því að fleiri fötluðum einstaklingum standi störf til boða.
Öll málefni samfélagsins eru málefni fatlaðs fólks
Fatlað fólk stundar nám, vinnur, kýs, eignast fjölskyldu og tekur þátt í menningu og félagslífi. Þess vegna ná verkefni okkar til ólíkra sviða samfélagsins.
Fólk með þroskahömlun kennir hönnunarnemum við Listaháskóla Íslands. Sýndarveruleiki gefur fólki færi á að æfa nýjar aðstæður. Stjórnmálaflokkar fá stefnuskrá sem þeir mega taka upp og vinna eftir.
Við þróum verkefnin með fötluðu fólki og samstarfsaðilum sem koma með ólíka reynslu og þekkingu.
Við fjölgum heimilum fyrir fatlað fólk
Fatlað fólk á að geta ráðið hvar þau búa og með hverjum. Skortur á húsnæði takmarkar hins vegar val margra.
Húsbyggingasjóður Þroskahjálpar á og rekur íbúðir fyrir fatlað fólk og vinnur að því að fjölga þeim. Sveitarfélög sjá um úthlutun og þjónustu við íbúa.
Orlofshús og gistiaðstaða
Við rekum Daðahús á Flúðum og gistiaðstöðu í Engjaþingi í Kópavogi.
Daðahús er heilsárshús, sérstaklega útbúið fyrir fatlað fólk. Þar er hægt að dvelja í orlofi með fjölskyldu eða vinum.
Engjaþing nýtist fötluðum börnum af landsbyggðinni og aðstandendum þeirra þegar sækja þarf þjónustu á höfuðborgarsvæðinu.
Réttindabarátta frá 1976
Þroskahjálp varð til þegar félög sem unnu að réttindum fólks með þroskahömlun og skyldar fatlanir tóku höndum saman. Síðan hafa samtökin unnið að breytingum á þjónustu, löggjöf og viðhorfum til fatlaðs fólks.
Baráttan heldur áfram þegar fólk fær ekki stuðninginn sem þau þurfa, kemst ekki inn á vinnumarkaðinn eða getur ekki flutt að heiman vegna skorts á húsnæði. Við fylgjum þessum málum eftir, bæði í samskiptum við stjórnvöld og með verkefnum sem takast á við hindranirnar.
Samstarf yfir landamæri
Þroskahjálp á aðild að Inclusion International, Inclusion Europe, EASPD og Nordic Inclusion.
Við vinnum einnig með FEDOMA, samtökum fatlaðs fólks í Malaví, að aukinni þátttöku fatlaðra barna í skóla og samfélagi. Í því samstarfi miðlum við reynslu og lærum hvert af öðru.
Eigum við að spjalla?
Ertu með spurningu, hugmynd að verkefni eða ábendingu um eitthvað sem þarf að laga? Það þarf ekki fullmótaða tillögu til að hafa samband.